Канон преподобному Сергию, игумену Радонежскому.            Тропарь, глас 4:      Иже добродетелей подвижник, яко истинный воин Христа Бога, на страсти вельми подвизался еси в жизни временней, в пениих, бдениих же и пощениих образ быв твоим учеником: темже и вселися в тя Пресвятый Дух, Егоже действием щедро украшен еси. Но яко имея дерзновение ко Святей Троице, поминай стадо, еже собрал еси, мудре, и не забуди, якоже обещался еси, посещая чад твоих, Сергие преподобне, отче наш.      Ин тропарь, глас 8.      От юности восприял еси Христа в души твоей, преподобне, и паче всего вожделел еси мiрскаго мятежа уклонитися, мужески в пустыню вселился еси, и чада послушания в ней, плоды смирения возрастил еси. Тем быв Троице вселение, чудесы твоими всех просветил еси приходящих к тебе верою, и исцеления всем подая обильно. Отче наш Сергие, моли Христа Бога, да спасет души наша.      Ин тропарь, глас 8.      В чистоте жития источник слез твоих, исповедания трудовныя поты совокупил еси, и купель духовную источил еси, священный Сергие преподобне, омываеши сугубстве творящым любовию память твою, скверны обоямо душевныя и телесныя. Сих ради чада твоя суще, вопием ти: моли, отче, Святую Троицу о душах наших.      Слава, и ныне, Богородичен:      Еже от века утаенное, и Ангелом несведомое таинство: Тобою, Богородице, сущим на земли явися Бог, в неслитном соединении Воплощаемь, и Крест волею нас ради восприим, имже воскресив первозданнаго, спасе от смерти души наша.      Канон, глас 8.      Песнь 1.      Ирмос: Колесницегонителя:      Христа, нас ради волею смирившагося, даже до рабия образа подражав, возлюбил еси смирение, и зельным бдением и молитвами, душегубныя страсти умертвив, на гору безстрастия возшел еси, Сергие пребогате.      Яко светильник света, твою душу слезными потоки украшая, и другаго Исаака подобно, сам себе вознесл еси, Преподобне, и сердце твое Богу пожерл еси.      Иже в чреве матерни трикраты проглашением, Троицы служитель показался еси, и Трисолнечным светом озаряемь, демонския ополчения яко паучину разорил еси, преблаженне Сергие.      Богородичен: Законов кроме естественных родила еси Законодавца, Бога и Человека бывша, Того яко Блага моли, Всенепорочная, наша беззакония презрети, вопиющих всегда: поим Господу, славно бо прославися.      Песнь 3.      Ирмос: Утверждей в начале:      Благих образ тебе дав твоим учеником, и привлек еси много души во cпасение, отлучившихся земнаго пристрастия, иже утешения улучиша райскаго наслаждения.      Яко доброплодная маслина в дому Божии, блаженне, процвел еси, и елеем умащая души, любовию тя поющих, преблаженне Сергие, и верою Христу вопиющих: несть свят паче Тебе, Человеколюбче.      Страсти душетленныя успил еси бодренными бдении, блаженне: и сих ради в чертог Небесный вселился еси, прием Богомудре Сергие, благодать исцелений.      Богородичен: Херувимов и Серафимов превышши, явилася еси, Богородице: Ты бо Едина прияла еси Невместимаго Бога во чреве Твоем, Нескверная. Темже Тя вси вернии песньми, Чистая, ублажаем.      Седален, глас 4.      Яко воистинну тленных оставив нестоянное, Христу от души последовал еси, и болезньми, и труды, и зельным воздержанем, яко безплотен пожив, преблаженне Сергие, моли Христа Бога, спастися душам нашим.      Слава, и ныне, Богородичен:      Херувимов и Серафимов превышшы еси, Богородице, небесе же и земли пространнейши, видимыя твари и невидимыя явилася еси преимущи несосудным сосуждением: Егоже бо пространствия Небеса не вмещают, в Твоей утробе вместила еси, Чистая, Егоже моли, спастися рабом Твоим.      Песнь 4.      Ирмос: Ты моя крепость, Господи:      Духа Пресвятаго храм, отче, был еси, и жизненных вод река исполняема, основание непоколебимо Церкве, монашествующих утверждение, Сергие досточудне.      Пророчески слезными каплями на всяк день постелю омочая, Сергие славне, дондеже до конца страстей пучину изсушил еси: темже память твою почитаем, присночестную и священную.      Лице Христово лицем, преподобне Сергие, зрети сподобился еси, зерцалом воистинну разрешшимся: сие бо и от мiра отлучи тя к возлюбленному желанию.      Богородичен: Очищение наших даруй неведений, яко Безгрешен, и умири мiр Твой, Боже, молитвами Рождшия Тя.      Песнь 5.      Ирмос: Вскую мя отринул еси:      В пощениих непреклонен пребыл еси, мудре, и до отшествия своего храня сие опасно, имже сподобился еси яве нетленнаго блаженства.      Остр ум имея к Богу внимати, страсти душетленныя успил еси отче, и снопы благоплодия пожал еси, питая благочестно восхваляющия тя, преподобне отче Сергие.      Светло житие твое, преподобне Сергие, и известно всем концем явися, и Божественныя доброты исполнено, молитвами же и пощеньми, и любовию, яже ко Христу Человеколюбцу.      Богородичен: Тя стену имуще, и заступлением Твоим соблюдаеми, Твоею Божественною славою хвалящеся, Тя ублажаем: Ты бо, Пречистая, душам нашим источаеши веселие и радование.      Песнь 6.      Ирмос: Очисти мя, Спасе:      Память твою творящим священную, отче, не престай моля Избавителя, даровати согрешений оставление, и Небесное Царство восприяти, идеже глас празднующих веселит вся.      О Христе укрепляемь, вся коварства лукаваго, твердым умом, Сергие, якоже сеть расторгнул еси, и пресветло светило мiру, отче, показался еси.      Светом Божественным осияем, и со ангелы ныне на небесех водворяяся, поминай верою чтущих память твою, преподобне Сергие приснопамятне.      Богородичен: Возвысила еси воистинну падшее человеческое существо, иже образом Божественным и Отца равенством, видимым Сыном Неизменным, Богомати, без семене во чреве поносивши.      Кондак, глас 8.      Христовою люовию уязвився, преподобне, и Тому невозвратным желанием последовав, всякое наслаждение плотское возненавидел еси, и яко солнце отечеству твоему возсиял еси: тем и Христос даром чудес обогати тя. Поминай нас, чтущих пресветлую память твою, да зовем ти: радуйся, Сергие Богомудре.      Ин кондак, глас 8.      Днесь, яко солнце пресветло, возсиявше от земли, честныя мощи твои нетленны обретошася, яко благоуханный цвет, множеством чудес сияюще, и всем верным источающе различные исцеления, и веселяще избранное твое стадо, еже мудре собрав, добре паствил еси. О нихже и ныне Троице предстоиши, моляся, и воинству победительная на враги даровати, да вси вопием ти: радуйся Сергие Богомудре.      Ин кондак, глас 8.      Яко безплотным равножитель, всех преподобных превзошел еси постническими труды и бдении молитвеннными, мудре Сергие, тем восприял еси от Бога исцелити недуги и прогонити бесы, и того ради вопием ти: радуйся, отче преподобне Сергие.      Икос:      Евангельский глас, отче, услышав, вся оставил еси плотская мудрования, богатство же и славу яко прах вменив, и на страсти яко безплотен подвизався, и безплотных ликостоянием, чести сподобился еси. Разума дарованием приял еси, еже и подаждь в песнех поющим ти сице: радуйся, Сергие преподобне и Богоносе, небесный человече, земный ангеле. Радуйся, Духа Святаго обитель. Радуйся, молитвами Богоданен дар приемый. Радуйся, яко прежде рождения проглашением прославив Святую Троицу, Яже тя прослави в жизни сей и по смерти. Радуйся, целомудрия столпе, имже всяка страсть попрася. Радуйся, яко от младых ногтей последовал еси Христу. Радуйся, светильниче многосветлый, возведый ко Христу монахов множества. Радуйся, похвало отечеству твоему. Радуйся, пророчеством украшенный, во еже прорицати яко настоящая будущая. Радуйся, яко молитвами твоими сопротивныя побеждаются. Радуйся, православным христианом похвала и утверждение. Ихже соблюди молитвами твоими от враг ненаветен, да зовем ти: радуйся, Сергие Богомудре.      Песнь 7.      Ирмос: Божия снизхождения:      В пещи искушений разжения Божественная благодать ороси тя, Преподобне, и многосветла Троическим желанием показа, зовуща: благословен Бог отец наших.      Мiр преобидев, славне Сергие, на земли яко безплотен пожил еси, и ангельским ликостоянием сподобился еси. Тем тя верою почитаем,досточудне.      В пристанище тихое вшед, Богомудре, житейских плаваний отвергл еси, и волнующимся житейскими спасительное окормление был еси, воспевающим: благословен Бог отец наших.      Богородичен: Жезл прорасте, Дево, из корене Иессеова всеблаженный плод, цвет носящи спасительный, верою Сыну Твоему вопиющим: отец наших Боже, благословен еси.      Песнь 8.      Ирмос: Седмерицею пещь:      Светоносный твой праздник, преблаженне Сергие, исполни радости и веселия духовнаго, благоухания же и провещения, тя имущим заступника и правило монашествующим.      Молитвою непрестанною к Богу возтекл еси, и оттуду Трисолнечными сиянии озарился еси, на враги борения поставив, приводя постников соборы новым житием, Христу вопиющым: дети благословите, священницы воспойте, людие превозносите Его во веки.      В пощениих крепкое, в молитвах неленостное, терпение в искушениих, Сергие, на земли показал еси, зовый: дети, благословите, священницы воспойте, людие, превозносите Его во веки.      Богородичен: Богородительнице Чистая, души моея язвы греховныя и соблазны очисти, ко источником примешающи, яже из ребр Рождества Твоего, иже от них потекшим струям: к Тебе бо взываю, и к Тебе прибегаю, и Тя призываю, Богоблагодатную.      Песнь 9.      Ирмос: Ужасеся о сем небо:      Светоявления духовнаго исполнен быв, преподобне Сергие, светильник сияя издалеча явился еси, словесныя зари нам облистая, и Пребожественныя Троицы жилище показался еси.      Воистинну тя велика учителя, мудре Сергие, Российским странам Христос дарова, неложным правлением правяща отечество свое, и учения сладчайша меда изливающа: ихже яко от окрина и мы, вернии, почерпаем независтно.      Душетленныя страсти победив, яко пастырь истинный упасл еси словесное Христово стадо, еже выну благодатию Духа яко цветы райския питая, преподобне.      Богородичен: Псалмы Тя воспеваем, Обрадованная, и немолчно Ти, еже радуйся, вопием: Ты бо источила еси всем радование.