Канон святым безсребренником и чудотворцем Косме и Дамиану, в Риме пострадавшим.
     
     Тропарь, глас 8.
     Святии безсребренницы и чудотворцы Космо и Дамиане, посетите немощи наша: туне приясте, туне дадите нам.
     
     КАНОН, глас 4-й
     Песнь 1-я.
     Ирмос: Тристаты крепкия, Рождейся от Девы, безстрастия во глубине души тричастное потопи, молюся, да Тебе, яко в тимпане, во умерщвлении телесе победное воспою пение.
     Двоице световидная мудрых безсребренник, Троице Честней со всеми избранными предстоящи, молися, память твою светоносную творящим просветитися Духа Божественными светлостьми.
     Превысоцы умом в сущих вещех явльшеся, невещественна блистания Духа, мудрии, приясте, святии. Темже тьму недугов разрешаете всегда посещении Божественными, безсребренницы.
     Слава: Недреманно душевное стяжавше око ко исполнению Божию Божественных заповедей, спящия в недузех, славнии, к доброму здравию возбуждаете благодатию, милостивии Богоноснии безсребренницы.
     И ныне: Спаса и Бога от чистых Твоих кровей воплотила еси, Чистая, показавшаго нам врачи душам нашим, Пречистая, спасительны и теплы заступники, честныя безсребренники, Духом.
     Песнь 3.
     Ирмос: Не мудростию и силою, и богатством хвалимся, но Тобою, Отчею Ипостасною Мудростию, Христе, несть бо свят, паче тебе, Человеколюбче.
     Миро благовонно исцелений Божествнный храм ваш источает священно, тучи духовныя, страсти злосмрадныя отмывая всегда.
     В Небесных селех водворяющеея всегда, сень вашу присно источник исцелений, премудрии, показуете благодатию Вседержителя.
     Слава: Плотския страсти воздержания броздою обуздавше, духовныя зари пребогатно приясте, темже исцеленьми мiр обогащаете.
     И ныне: Краснейшу в женах Тя Бог избра и из Тебе плотски, Чистая, родитися благоизволи, почиваяй во святых Своих.
     Седален, глас 8.
     Подобен: Премудрости:
     Исцелений датели, и чудотворцы, и чудес светильники светоприемнии всем явистеся духовною благодатию, страстный бо пламень верою прохлаждаете и верным в ней смысл согреваете. Тем врачество ваше душевное стяжавше, Божественную церковь вашу, к нейже прибегающе, вопием: Богоносцы безсребренницы, молите Христа Бога согрешений оставление даровати празднующим любовию святую память вашу.
     Слава, глас и подобен тойже:
     Исцелений зари сущим на земли возсияюще, Божественнии чудотворцы, яве отгоняете человеков недуги, воистинну незаходимаго Солнца в себе стяжавше, Христа Бога нашего. Темже достойно сошедшеся, почитаем славную, святии и честную вашу память, Богоноснии безсребренницы. Молите Христа Бога грехов оставление даровати чтущим любовию святую память вашу.
     И ныне, Богородичен:
     Яко Деву и едину в женах, Тя, без семене Рождшую Бога плотию, вси ублажаем, роди человечестии: Огнь бо вселися в Тя Божества, и яко Младенца, млеком питаеши Зиждителя и Господа. Тем, Ангельский и человеческий род, достойно славим Пресвятое Рождество Твое и согласно вопием Ти: моли Христа Бога согрешений оставление даровати покланяющимся верою Пресвятому Рождеству Твоему.
     Песнь 4.
     Ирмос: Седяй в славе, на престоле Божества, во облаце легце, прииде Иисус Пребожественный, Нетленною Дланию и спасе зовущия: слава, Христе, силе Твоей.
     Живоносными действы, всяческими деянии, смертоносныя страсти человеков исцеляете, световиднии столпи, забрала недвижима, винограда истиннаго Божественыя лозы.
     Сосцы Церковнии, иже млеко проливающе исцелений, просвещений, бессребренницы, питающе всех Божественными брашны, да восхвалятся радостными песньми.
     Слава: Врачество показася храм ваш, святии, обуреваемым небурно пристанище и спасительно, воньже притекающе, вси приемлем тишину и лютых избавление.
     И ныне: Милости мя, Дево, яже в Тебе, сподоби, Рождшая Слово, едина воистинну Милостивное, Едино милостивны святыя показавшее, целители и чудотворцы в концех.
     Песнь 5.
     Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем, воспевающим Тя мир Подавающая.
     Божественными светлостьми яве облистаеми, весь обходите мiр, вся человеки просвещаете, тьму отъемлюще страстей, демоны прогоняюще, Богоноснии безсребренницы.
     Яко два просвещаете светильника поднебесную, духодвижно, Богоносцы, всю тварь обходяще, и иже на одре болезней посещающе, и от бед изымающе.
     Слава: Недугующим исцеление, страстей избавление подающе безсребренно, всем предстатели велицы явистеся, всем помощницы с Богом, всем заступницы, Богоноснии безсребренницы.
     И ныне: Мудрость породила еси Божию Ипостасную, Пречистая Дево Богородице, святыя премудры Показавшую, имиже зломудреца падеся шатание и лютая ухищрения.
     Песнь 6.
     Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.
     Не хитростию человеческою, но Божественною благодатию, очищаете недуги человеков, славнии, сего ради, сошедшеся, по долгу вас ублажаем.
     Любовию ко Христу, Богоноснии, связаеми, всю злобу демонов разрушаете Божественною благодатию, сего ради ваше совершаем торжество.
     Слава: Яко суще винограда Божественнаго прозябения, вино нам исцелений, сущим в сетовании недугов, точаще, веселия исполняете, безсребренницы.
     И ныне: Храм Тя чист содела, Владычице, Пречистое Слово, Еже Божественный храм безсребренник величая в чудесех и знамениих всегда.
     
     Кондак, глас 2.
     Благодать приимше исцелений, простираете здравие сущим в нуждах, врачеве, чудотворцы преславнии, но вашим посещением ратников дерзости низложите, мiр исцеляюще чудесы.
     Икос: Всякаго разума и мудрости преходит слово мудрых врачев, и всем разум подают: Вышняго бо благодать приемше, невидимо здравие даруют всем. Отонюдуже и мне повести благодать даровася пети, яко Богоносныя угодники Христовы и служители, исцелений множество подающия, болезни бо всех избавляют, мiр исцеляюще чудесы.
     Песнь 7.
     Ирмос: В пещи авраамстии отроцы персидстей, любовию благочестия паче, нежели пламенем опаляеми, взываху: благословен еси в храме славы Твоея, Господи.
     Отверзающе источник Богоданный, святии, всем реки источаете чистых исцелений, отмывающе страстей сквернения и демонов злобу всегубительную.
     Укрепляема Вседержителя Духа благодатию, здравие болящим подает двоица безсребренник Твоих досточудная, Слове Божий, Мудросте и Сило.
     Слава: Свят Един еси, прославляя святыя Твоя, мiр бо тех ради избавляеши от бед и провещаеши зовущия: благословен еси в храме славы Твоея, Господи.
     И ныне: Жезл из корене Иессеева Ты прозябла еси, Цвета Христа источивше, Марие, яко цветцы, чудесы Украсившаго Своя безсребренницы угодныя.
     Песнь 8.
     Ирмос: Руце распротер Даниил, львов зияния в рове затче, огненную же силу угасиша, добродетелию препоясавшеся,благочестия рачителие, отроцы взывающе: благословите, вся дела Господня, Господа.
     Нази всякия явистеся вражия злобы, святии, Божественным Духом, нам бывше одежда спасения и оставления вина, и лютых пременение, вопиющим: вся дела благословите, Господня, Господа.
     Сынове по причастию Божии, Дамиане и Космо, бывше, верою отеческий жребий ныне обретосте, Небесное наслаждение, и чудес светлое воистинну действо, и вопиете: вся дела благословите, Господня, Господа.
     Кропленьми вашими Боголепными скверну омыйте душевную нашу, и болезненныя, святии, прожените страсти, и демонская стремления отымите, яко предстателие и яко целителие наши, милостивии.
     Слава: Яко крин, яко цвет мысленный, яко шипцы, духом украшени, нам явистеся, святии, благовоние воспущающе и злосмрадие страстей отгоняюще, вопиющим: вся дела благословите, Господня, Господа.
     И ныне: Умерщвляется смерть Тобою, Жизнь бо родила еси Ипостасную, Христа Бога, Пречистая, и предстатели жизни нашея показавшаго, безсребренники врачи, вопиющим: благословен, Пречистая, Плод Твоего Чрева.
     Песнь 9.
     Ирмос: Ева убо недугом преслушания клятву вселила есть, ты же, Дево Богородице, прозябением чревоношения мiрови благословение процвела еси. тем Тя вси величаем.
     Се ныне что добро или что красно, якоже пишет, но токмо, еже жити братии в единомышлении, в месте светозарне, в селех Небесных, во славе неувядающей, яже по достоянию ублажаем.
     Яко велик сий храм, чудесы всегда украшаемь, воньже присно приходяще, Космо и Дамиане досточуднии, здравие требующим подаваете, темже достойно блажими есте.
     Днесь срадуются нам, блаженнии, в памяти вашей, Ангели и Божественнии Апостоли, пророцы и преподобнии и вси праведницы, с ними же радостно водворяющеся, за весь мiр молитеся.
     Слава: Божественная двоице и светозарная, безсребреннии и Богоноснии и всечестнии, оставление согрешений и исправление жития испросите, и всех лютых избавление восхваляющим вас всегда.
     И ныне: Света жилище, Чистая, была еси, вся Озарившаго и светоносны и святы Показавшаго, ныне тьму Отъемлюща страстей душетленных Духом, Пречистая Едино Приснодево.
     
     
     Молитва:
     К вам, святии безсребренницы и чудотворцы Космо и Дамиане, яко к скорым помощником и теплым молитвенником о спасении нашем, мы. недостойнии, преклоньше колена, прибегаем и, припадающе, усердно вопием: не презрите моления нас, грешных, немощных, во многия беззакония впадших, и по вся дни и часы согрешающих. Умолите Господа, да пробавит нам, недостойным рабом Своим, великия и богатыя своя милости. Избавите нас от всякия скорби и болезни, вы бо прияли есте от Господа и Спаса нашего Иисуса Христа неоскудную благодать исцелений, ради твердыя веры, безмезднаго врачевания и мученическия кончины вашея. Услышите нас, молящихся, и благоприятным ходатайством вашим испросите у Христа Бога православным людем на враги победу и одоление. Паки, припадающе, прилежно молим: испросите нам у Господа вся благополезная, яже в животе нашем временнем, наипаче же ко спасению вечному служащая, да сподобимся молитвами вашими улучити кончину христианскую, безболезненну, непостыдну, мирну, и да избавимся от козней диавольских и вечныя муки, безконечнаго же и блаженнаго Царствия Небеснаго наследницы будем. Ей, угодницы Божии, не престайте, молящеся за ны, с верою к вам притекающия. Аще бо по множеству грехов наших и несмы достойни милосердия вашего, обаче вы, вернии подражателие человеколюбия Божия суще, сотворите, да принесем плоды достойны покаяния и в вечный покой достигнем, хваляще и благословяще Дивнаго во святых Своих Господа и Бога и Спаса нашего Иисуса Христа, и Пречистую Матерь Его, и ваше теплое заступление всегда, ныне, и присно и во веки веков.
     Аминь.