ПОСЛЕДОВАНИЕ МОЛЕБНА КО СВЯТОМУ ВЕЛИКОМУЧЕНИКУ, ПОБЕДОНОСЦУ, И ЧУДОТВОРЦУ ГЕОРГИЮ.            По обычном начале читаем псалом 142: Господи, услыши молитву мою:      По псалме: Слава, и ныне:      Аллилуиа, аллилуиа, аллилуиа, слава Тебе, Бoже. Трижды.      По сем, Бог Господь, и явися нам: со стихи его:      1-й: Исповедайтеся Господеви, яко Благ, яко в век милость Его.      2-й: Обышедше обыдоша мя и именем Господним противляхся им.      3-й: Не умру, но жив буду, и повем дела Господня.      4-й: Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших.      И тропарь, глас 4.      Яко пленных свободитель, и нищих защититель, немощствующих врач, православных поборниче, победоносче, великомучениче Георгие, моли Христа Бога спастися душам нашим.      Слава, ин тропарь, глас тойже:      Подвигом добрым подвизался еси, страстотерпче Христов, верою и мучителей обличил еси нечестие, жертва же благоприятна Богу принеслся еси. Темже и венец приял еси победы, и молитвами, святе, твоими всем подаеши прегрешений прощение.      И ныне, тропарь праздника.      Аще ли несть праздника, глаголи Богородичен воскресен четвертаго гласа:      Еже от века утаенное, и Ангелом несведомое таинство: Тобою, Богородице, сущим на земли явися Бог, в неслитном соединении Воплощаемь, и Крест волею нас ради восприим, имже воскресив первозданнаго, спасе от смерти души наша.      Таже, псалом 50-й: Помилуй мя, Боже, по велицей милости Твоей:            Канон, творение кир Феофана. Глас 2.      Поем же его без ирмосов.      Песнь 1.      Ирмос: Во глубине постла иногда:      Припев: Святый великомучениче, победоносче и чудотворче Георгие, моли Бога о нас.      Теплою верою и любовию призывающих тя, мучениче Христов, венценосче Георгие, предстоя всесветел честному престолу всеми Владущаго, твоими молитвами и предстательствы сохрани.      Припев: Святый великомучениче, победоносче и чудотворче Георгие, моли Бога о нас.      Благородно возделание Христу был еси, Георгие, мученическими возделан деянии, и, яко богатство преславно, в небесных тя сокровищах положи Подвигоположник, яко преизящне храбрствовавшаго.      Припев: Святый великомучениче, победоносче и чудотворче Георгие, моли Бога о нас.      Твердо и терпеливно устремился еси, самозван, к подвигом, преблаженне Георгие, и, низложив свирепое мучителей ополчение, молитвенник о всех призывающих тя был еси.      Слава Отцу и Сыну и Святoму Духу.      Блаженную, славне, жизнь ныне восприем, во Христе сокровенную, Георгие, о нейже подвизался еси до крове, верою поющим тя моли спастися от всякаго, страстотерпче, обстояния.      И ныне и приснo и вo веки векoв. Аминь.      Богородичен: Небо была еси словесное, Слово Небесное в Твоей утробе, Богомати, вмещшая, Имже вся быша: Небо же и земля, и яже выше сих. Темже со дерзновением моли спасти поющих Тя.      Песнь 3.      Ирмос: Процвела есть пустыня:      Припев: Святый великомучениче, победоносче и чудотворче Георгие, моли Бога о нас.      Венцем страдания сияя, славне, благочестно призывающия тя моли Избавителя и Бога от всякия нужды, блаженне, избавити.      Припев: Святый великомучениче, победоносче и чудотворче Георгие, моли Бога о нас.      Богатыми просвещаемь сиянии, премудре, мрачную отжени печаль и мглу страстей от нас, верою восхваляющих тя.      Слава Отцу и Сыну и Святoму Духу.      Надеждею утверждаемь и любовию, верою же ограждься, Георгие, и силою укреплься Христовою, идольскую прелесть низвергл еси.      И ныне и приснo и вo веки векoв. Аминь.      Богородичен: Просвещшаго концы, Пречистая, родила еси с плотию Безплотнаго и прежде всех Отцу Собезначальна, темже Тя, Богородицу, вернии, чтим.            По третией песни поем:      Спаси от бед рабы твоя, страстотерпче Георгие, яко вси тя к Богу предстателя имамы, яко непобедимаго Христова воина и тепла к Нему молитвенника.      Посем, Господи, помилуй, 3 раза.      Седален, глас 8. Подобен: Премудрости:      Благочестия образы мужески храбрствуя, нечестия прелесть низложив, мучениче, попрал еси врага шатание: и Божественным желанием разгараемь, мучителей угасил еси безбожное свирепство. Темже достойно возмездие мук приял еси венец, и подаеши исцеления верою притекающим. Страстотерпче Георгие, моли Христа Бога, согрешений оставление даровати, празднующим любовию святую память твою.      Слава, и ныне, праздника.            Песнь 4.      Ирмос: Пришел еси от Девы:      Припев: Святый великомучениче, победоносче и чудотворче Георгие, моли Бога о нас.      Поем твоя подвиги, преблаженне Георгие, имиже разсыпал еси идольския службы, всю же упразднил еси демонскую прелесть, преславне.      Припев: Святый великомучениче, победоносче и чудотворче Георгие, моли Бога о нас.      Утиши напастей и бед смущение, и всякое наветие злое демонов отжени от поющих тя, Христова воина, досточудне.      Слава Отцу и Сыну и Святoму Духу.      Возсиял еси, яко звезда светоносная, Георгие, душевною доблестию, и твердостию веры прелесть мрачную отгоня и спасая поющия тя.      И ныне и приснo и вo веки векoв. Аминь.      Богородичен: Спасение Существенное, Дево, родила еси, богатством благости и естественною благостынею Спасающее человека и истлевший образ Назидающее.            Песнь 5.      Ирмос: Просвещение во тьме лежащих:      Припев: Святый великомучениче, победоносче и чудотворче Георгие, моли Бога о нас.      Мученическое дерзновение яко имея ко Владыце, проси усердно спасения тя поющим, душевных недуг изменяя твоими мольбами, мучениче страстоносче, преблаженне Георгие.      Припев: Святый великомучениче, победоносче и чудотворче Георгие, моли Бога о нас.      Со Ангельскими ликуя, яко мученик, ликостоянии и безсмертныя и блаженныя, венценосче, насыщаяся славы, покрову твоему прибегающия всякаго треволнения и бури исхити.      Слава Отцу и Сыну и Святoму Духу.      Избави нас от всякия нужды, яко Милостив, греховное и бедное отгоня многоразличное смущение, Георгия Твоего угодника молитвы, Христе, приемля.      И ныне и приснo и вo веки векoв. Аминь.      Богородичен: Долг праматере Евы, Богомати, отдала еси, плотию бо обожила еси из Тебе Рожденна Спаса мiра. Темже Тя вси блажим, Обрадованная Дево Всенепорочная.            Песнь 6.      Ирмос: В бездне греховней валяяся:      Припев: Святый великомучениче, победоносче и чудотворче Георгие, моли Бога о нас.      Паче естества, и слова, и помысла доблести твоея храбрствования, непрестанно певаема, преблаженне мучениче Георгие.      Припев: Святый великомучениче, победоносче и чудотворче Георгие, моли Бога о нас.      Воинству Небесному собеседник, блаженне быв и Божественное явление, елико достижно зря, тя верою чтущия спасай.      Слава Отцу и Сыну и Святoму Духу.      Всеми образы Богу возложен и блистания чудес приемля, дарования требующим раздаваеши, преблаженне Георгие.      И ныне и приснo и вo веки векoв. Аминь.      Богородичен: Ныне к Тебе прибегаю, Пречистая, спаси мя молитвами Твоими и соблюди: елико бо хощеши, можеши, яко Мати Всемогущаго.      Посем, Спаси от бед: и прочая, якоже и по третией песни.      Кондак, глас 4.      Подобен: Вознесыйся:      Возделан от Бога, показался еси благочестия делатель честнейший, добродетелей рукояти собрав себе: сеяв бо в слезах, веселием жнеши, страдальчествовав же кровию, Христа приял еси и молитвами, святе, твоими всем подаеши прегрешений прощение.      Икос:      За мiрский живот душу Свою Положившаго, Христа Царя желая, воин тщится умрети за Него, ревность же велию Божественную в сердцы имея, себе самого приведе. Того убо и мы вси, Божественнаго Георгия, яко тепла предстателя воспоим верою, яко славнаго суща Христова раба, подобящася яве своему Владыце и всякому молящуся приходяща: спешит бо присно и молит Спаса всем подати согрешений прощение.            Песнь 7.      Ирмос: Богопротивное веление:      Припев: Святый великомучениче, победоносче и чудотворче Георгие, моли Бога о нас.      Твоему подобяся, мучениче, Владыце, волею потекл еси к подвигом, славне, и, победу взем, Церкве Христовы хранитель был еси: Сию присно сохраняй предстательством твоим.      Припев: Святый великомучениче, победоносче и чудотворче Георгие, моли Бога о нас.      Яко мученик непобедим яко страдалец, яко неодоленный веры поборник, ныне столп непоколебим восхваляющим тя, премудре Георгие, буди, ограждая молитвами твоими.      Слава Отцу и Сыну и Святoму Духу.      Мудре земледелав Божественное семя, и сие умножил еси, кровей твоих теченьми напоив, блаженне, и болезней тщанием, и различными ранами, имиже сверепство мучителей угасил еси.      И ныне и приснo и вo веки векoв. Аминь.      Богородичен: Дева пребыла еси и по Рождестве, Бога бо родила еси, Питающаго всяческая, за неизреченную милость и милосердие многое Человека бывшаго, Чистая, Егоже ныне моли спастися всем нам.            Песнь 8.      Ирмос: Пещь иногда огненная:      Припев: Святый великомучениче, победоносче и чудотворче Георгие, моли Бога о нас.      Поток лютых страстей же и бед, и мятежнаго обстояния, и болезней падения, и демонов козни, и злочестивых стремления укроти твоими молитвами, венценосче Георгие.      Припев: Святый великомучениче, победоносче и чудотворче Георгие, моли Бога о нас.      Весь светом, блаженне, Троическим чисто облистаемь, яко мученик непобедим, яко благочестия поборник, яко победитель Боговенчанен, спаси, Небесный жителю, тя чтущия молитвами твоими.      Слава Отцу и Сыну и Святoму Духу.      Венцем разумным различно украшен, и Царскою диадимою, и скиптром удобрен, и багряницею обложен, твоею обагрен кровию, блаженне, сцарствуеши Царю сил.      И ныне и приснo и вo веки векoв. Аминь.      Богородичен: От Отца безлетно Рожденнаго и прежде век Возсиявша, всяческая Сотворшаго, видимая же и невидимая, Дево Мати родила еси. Темже Тя, Богородицу, вси языцы, славим.            Песнь 9.      Ирмос: Безначальна Родителя Сын:      Припев: Святый великомучениче, победоносче и чудотворче Георгие, моли Бога о нас.      Непрестанно Господа моли о нас, поющих тя, блаженне, яко Христова мученика, яко победивша мучителя, яко лукавых духов отгонителя, яко хранителя неусыпна, яко заступника непостыдна.      Припев: Святый великомучениче, победоносче и чудотворче Георгие, моли Бога о нас.      Страданий воздаяния богатно тебе дарова всех Владыка, Емуже предстоя со дерзновением, преблаженне, мученическим и с веселием, призывающия тя, объемь, сохрани.      Слава Отцу и Сыну и Святoму Духу.      Земля тя сокры, и Небо прият, и отверзеся тебе дверь райская яве, в немже радостно, страстотерпче, ликуя и играя, верно поющия тя твоими молитвами соблюди.      И ныне и приснo и вo веки векoв. Аминь.      Богородичен: Тя свидения сень прообрази, Пречистая, в нейже скрижали, и стамна, и златый кивот: якоже бо оноя, тако и Ты Безначальное слово во утробе вместила еси, Богородице, Воплощаемо.      Катавасия: Светися, светися:      [Аще ли по отдании Святыя Пасхи сей молебен поеши, глаголи задостойник праздника. Аще ли несть праздника, Достойно есть:].      Посем, Трисвятое. И по Отче наш:      Тропари: Яко пленных свободитель: якоже в начале на Бог Господь: предъуказахом.      Посем, Господи помилуй, 40 раз.      Слава, и ныне:      Приложи же по сем и молитву ко святому великомученику и чудотворцу Георгию.      И по молитве:      Достойно есть, яко воистинну, блажити Тя, Богородицу, Присноблаженную и Пренепорочную и Матерь Бога нашего.      Честнейшую Херувим, и Славнейшую без сравнения Серафим, без истления Бога Слова Рождшую, сущую Богородицу Тя величаем.      Господи, помилуй, трижды. Господи, благослови.      И отпуст:      Господи, Иисусе Христе, Боже наш, молитв ради Пречистыя Твоея Матере и святаго славнаго великомученика, победоносца и чудотворца Георгия, и всех ради святых, помилуй и спаси нас, яко Благ и Человеколюбец.      Аминь.