ПОСЛЕДОВАНИЕ МОЛЕБНА КО СВЯТОМУ ВЕЛИКОМУЧЕНИКУ И ЦЕЛИТЕЛЮ ПАНТЕЛЕИМОНУ
     
     Молитвами святых отец наших, Господи, Иисусе Христе, Сыне Божий, помилуй нас. Аминь.
     Слава Тебе, Боже наш, слава Тебе.
     Царю Небесный, Утешителю, Душе истины,
     Иже везде Сый и вся исполняяй,
     Сокровище благих и жизни Подателю,
     прииди и вселися в ны и очисти ны от всякия скверны
     и спаси, Блаже, души наша.
     Святый Боже, Святый Крепкий, Святый Безсмертный, помилуй нас. (Трижды.)
     Слава Отцу и Сыну и Святому Духу, и ныне и присно и во веки веков. Аминь.
     Пресвятая Троице, помилуй нас.
     Господи, очисти грехи наша.
     Владыко, прости беззакония наша.
     Святый, посети, исцели немощи наша Имени Твоего ради.
     Господи, помилуй. (Трижды )
     Слава Отцу и Сыну и Святому Духу, и ныне и присно и во веки веков. Аминь.
     Отче наш! Иже еси на Небесех.
     Да святится Имя Твое.
     Да приидет Царствие Твое.
     Да будет воля Твоя, яко на Небеси и на земли.
     Хлеб наш насущный даждь нам днесь.
     И остави нам долги наша,
     якоже и мы оставляем должником нашим.
     И не введи нас во искушение.
     Но избави нас от лукаваго.
     Господи, Иисусе Христе, Сыне Божий, помилуй нас.
     Аминь.
     Господи, помилуй, 12 раз.
     Слава Отцу и Сыну и Святому Духу, и ныне и присно и во веки веков. Аминь.
     Приидите, поклонимся Цареви нашему Богу.
     Приидите, поклонимся и припадем Христу, Цареви нашему Богу.
     Приидите, поклонимся и припадем Самому Христу, Цареви и Богу нашему.
     И псалом 142-й
     Господи, услыши молитву мою, внуши моление мое во истине Твоей, услыши мя в правде Твоей и не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой, посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои, душа моя яко земля, безводная Тебе. Скоро услыши мя, Господи, исчезе дух мой. Не отврати лица Твоего от мене и уподоблюся низходящим в ров. Слышану сотвори мне заутра милость Твою, Господи, яко на Тя уповах. Скажи мне, Господи, путь Твой, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой Благий наставит мя на землю праву. Имене ради Твоего, Господи, живиши мя, правдою Твоею изведеши из печали душу мою. И милостию Твоею потребиши враги моя и погубиши вси, стужающие души моей, яко аз раб Твой есмь.
     По псалме Слава Отцу и Сыну и Святому Духу, и ныне и присно и во веки веков. Аминь.
     Аллилуиа, аллилуиа, аллилуиа, слава Тебе, Боже. Трижды.
     Господи, помилуй, трижды.
     Слава Отцу и Сыну и Святому Духу, и ныне и присно и во веки веков. Аминь.
     По сем Бог Господь и явися нам, благословен Грядый во имя Господне во глас 3-й со стихи обычными:
     1-й: Исповедайтеся Господеви, яко Благ, яко в век милость Его.
     2-й: Обышедше обыдоша мя и именем Господним противляхся им.
     3-й: Не умру, но жив буду, и повем дела Господня.
     4-й: Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших.
     
     И тропарь святому великомученику Пантелеимону:
     Cвятый великомучениче и целителю Пантелеимоне, моли Милостиваго Бога да прегрешений оставление подаст душам нашим.
     Слава Отцу и Сыну и Святому Духу, и ныне и присно и во веки веков. Аминь.
     Тя, Ходатайствовавшую спасение рода нашего, воспеваем, Богородице Дево, плотию бо, от Тебе Восприятою Сын Твой и Бог наш, Крестом восприим страсть, избави нас от тли, яко Человеколюбец.
     
     Посем, псалом 50-й: Помилуй мя, Боже:
     
     Канон, творение Феофаново, глас 2. Читаем его без ирмосов на 4.
     Песнь 1.
     Ирмос: Во глубине постла иногда фараонистское всевоинство преоруженная сила, воплощшееся же Слово всезлобный грех потребило есть: Препрославленный Господь, славно бо прославися.
     Запев: Святый великомучениче и целителю Пантелеимоне, моли Бога о нас. [Поклон]
     Приступль усердно ко Христу, прежде скончания еже о Христе, мертвеца первее воздвиже. Ныне же мя, пребогате, умерщвена греховными снедении, твоими мольбами, о Пантелеимоне, оживи.
     Запев: Святый великомучениче и целителю Пантелеимоне, моли Бога о нас.
     Восия якоже звезда, нося во юности старостный и богомудрый разум, добротою же тела, благолепие души стяжав, препрославленному Слову явился еси прекрасен.
     Запев: Святый великомучениче и целителю Пантелеимоне, моли Бога о нас.
     Умертвився мiру, и во Христа, блаженне, одеявся, банею крещения бысть богоносен орган, и приятелище действа Духу, всем угождая, всем уврачуя недуги.
     Слава Отцу и Сыну и Святому Духу.
     Премудрость сестру себе притворив, и причастник жизни ведом от нея почтеся, и венцем дарований украсися, Божественныя зари, блаженне, облистая светлостию.
     И ныне и присно и во веки веков. Аминь.
     Богородичен. Благословеньми, Пресвятая Чистая, естество, удалено преслушанием бывшее от Зиждителя Христа, рождьши венчала еси, и тления свободила еси, темже радующеся, вси вернии Тя ублажаем.
     Песнь 3.
     Ирмос: Процвела есть пустыня яко крин, Господи, языческая неплодящая церковь, пришествием Твоим, в нейже утвердися мое сердце.
     Запев: Святый великомучениче и целителю Пантелеимоне, моли Бога о нас.
     Словеса Духа услышав, был еси яко земля добрая и благоплодная, приемши семя многоценно, и рождьши, треблаженне, спасение душам.
     Запев: Святый великомучениче и целителю Пантелеимоне, моли Бога о нас.
     Умертвил еси мудрование змиина угрызения, и душу оживил еси, Богодухновенен быв, и Цареви всех предстоя.
     Запев: Святый великомучениче и целителю Пантелеимоне, моли Бога о нас.
     Посрамил еси безбожное мучителей повеление, и Христови притекл еси, вместо всех Сего стяжав, и был еси, Богомудре, великий купец.
     Слава Отцу и Сыну и Святому Духу.
     Матере твоея благочестие возлюбль, славне, отчее же возненавидел еси безбожие многомятежное, яко имея разум, лучьшее избрал еси.
     И ныне и присно и во веки веков. Аминь.
     Богородичен. Носяи Божественным мановением, всю тварь Господь, на руку носится Твоею, Дево. Егоже ныне моли, избавити от бед поющыя Тя.
     По 3-й песни поем катавасию: Моли Бога о нас, святый великомучениче и целителю Пантелеимоне, яко мы усердно к тебе прибегаем, скорому помощнику и молитвеннику о душах наших.
     И по сем Господи, помилуй, 12 раз, Слава, и ныне.
     Седален, глас 4.
     Добляго страдальца благочестия Христова восхвалим светло Пантелеимона, вернии, псалмы и пении и песньми духовными, имже мучительство невидимаго врага силою Божественною попрася и недугов исцеление богатно от Господа даровася творящим верно Божественный и честный праздник его.
     Слава, глас тойже:
     Ермолая мудраго, мучениче, словеса послушал еси и оставил еси абие художество земное, яко мерзко, яко некрепко, яко губительно, имея Христовы страсти, учения жизни в сердце твоем, неисцельно страждущим здравие, Пантелеимоне, даруя. Темже молися о творящих любовию память твою.
     И ныне, Богородичен:
     Треволнении страстными, безсовестный обуреваемь, Чистая, призваю Тя тепле: да не презриши мене, окаяннаго, погибнути, бездну милосердия рождши, разве бо Тебе надежды не имам, да не врагом убо обрадование и смех, надеявся на Тя, явлюся, ибо можеши, елико хощеши, яко Мати сущи всех Бога.
     Песнь 4.
     Ирмос: Пришел еси от Девы, не ходатай, ни ангел, но Сам, Господи, воплощься, и спасл еси всего мя человека, тем зову Ти: слава силе Твоей, Господи.
     Запев: Святый великомучениче и целителю Пантелеимоне, моли Бога о нас.
     Последуя Владыце любовию, расточил еси богатство нищым, себе обнажая к страданию, еже и прошел еси, вечныя надежди провиде.
     Запев: Святый великомучениче и целителю Пантелеимоне, моли Бога о нас.
     Хваления Богови жертву принесл еси, яве возгнушався идольских треб, все же шатание нечестивых, страстотерпче, попрал еси.
     Запев: Святый великомучениче и целителю Пантелеимоне, моли Бога о нас.
     Снедаемым завистию, и гневом борющым, непоборимую силу сим представил еси, мучениче, и победил еси злочестивое томление вооружився.
     Слава Отцу и Сыну и Святому Духу.
     Иже старца Симеона рукама Держимый, старца тя глаголы, Пантелеимоне, улови, к Божественному разумению, и ко многих спасению и избавлению.
     И ныне и присно и во веки веков. Аминь.
     Богородичен: Юныя и девы во вслед Тебе потекоша, Деву и Отроковицу Тя и Матерь знающе. Едина бо обоя во едино собрала еси, несказанно Богоневесто.
     Песнь 5.
     Ирмос: Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим: иного бо разве Тебе Бога не знаю.
     Запев: Святый великомучениче и целителю Пантелеимоне, моли Бога о нас.
     Радостно подвиги подъял еси мучения. огражден силою Божественною и терпением, твердо мучения подъемля, радуяся вопияше: иного бо разве Тебе Бога не знаем.
     Запев: Святый великомучениче и целителю Пантелеимоне, моли Бога о нас.
     Юношеско ты противление имея, и твердостию души воставление стяжав, всяку язву доблественне претерпе, и мужеским, блаженне, умом благодатию Божественнаго Креста укрепляемь.
     Слава Отцу и Сыну и Святому Духу.
     Несогласное отрину вещание заблуждьших, Небесным учением, страдалец, и многим спасению преславну бысть виновник, твоим действом о Христе укрепляемь.
     И ныне и присно и во веки веков. Аминь.
     Богородичен: Речения премудрых и гадания вся, Препрославленая, и пророк проречения, Тя проображаху, проявленно напоследок быти Божию Родительницу, иныя бо разве Тебе Чистыя не знаем.
     Песнь 6.
     Ирмос: В бездне греховней валяяся, неисследную милосердия Твоего призываю бездну, от тли, Боже, мя возведи.
     Запев: Святый великомучениче и целителю Пантелеимоне, моли Бога о нас.
     Идолы лестныя оплевал еси, и возносимую прелесть упразднил еси, чудодействуя дивная, и творя исцеления, Богомудре.
     Запев: Святый великомучениче и целителю Пантелеимоне, моли Бога о нас.
     Венечник показася всеизрядне, сквозе бо огнь ты пройде и воду, и на колеси протязаемь, преславно погубил еси безумныя.
     Слава Отцу и Сыну и Святому Духу.
     Мучителей суровьство низложил еси, не удобь носимая биения телесная, душевною крепостию пострадал еси, Богомудре, благодатию.
     И ныне и присно и во веки веков. Аминь.
     Богородичен: Содержаи концы земли яко Бог, Твоима руками, Чистая, держится, описанием тела, иже Божественным зраком не описанный.
     По 6-й песни паки катавасия:
     Моли Бога о нас, святый великомучениче и целителю Пантелеимоне, яко мы усердно к тебе прибегаем, скорому помощнику и молитвеннику о душах наших.
     И по сем Господи, помилуй, 12 раз, Слава, и ныне.
     
     Кондак, глас 5-й:
     Подражатель сый Милостиваго и исцелений благодать от Него прием, стратотерпче и мучениче Христа Бога, молитвами Твоими душевныя наша недуги исцели, отгоняя присно борца соблазны от вопиющих верно: спаси ны, Господи.
     Икос: Безсребренника память, добляго страдальца, вернаго целебника, благочестно воспоем, христолюбцы, да приимем милость, паче же оскверншии, якоже и аз, своя храмы, душам бо и телом, возлюбленнии, исцеления подавает. Потщимся убо, верная братия, в сердцах наших имети его крепость, избавляюща о лести вопиющия: спаси ны, Господи.
     Песнь 7.
     Ирмос: Образу златому на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.
     Запев: Святый великомучениче и целителю Пантелеимоне, моли Бога о нас.
     Законно стражда, и победив врага, пристанище благоутишно, иже в мори славне обуреваемым был еси, свет же сущым во тьме жития, ихже пети научил еси, благословен Бог отец наших.
     Запев: Святый великомучениче и целителю Пантелеимоне, моли Бога о нас.
     Блажен еси и добро тебе есть ныне преблаженне. восприимшему пребогатную и блаженную надежду свою, уготованную верою Господеви зовущым, благословен Бог отец наших.
     Слава Отцу и Сыну и Святому Духу.
     Святых души, и праведных лицы, и безплотных чин ангельский прият, сликовника, блаженне, мечем бо усечен быв во главу, поеши радуяся, благословен Бог отец наших.
     И ныне и присно и во веки веков. Аминь.
     Богородичен: Оружие еже прежде древа животнаго, нас отлучившее, ныне обращаемо приемлет, знаменавшыяся кровию, иже из ребр Сына Твоего изшедшею, Пренепорочная. Благословена еси, Яже Бога плотию Рождьшая.
     Песнь 8.
     Ирмос: В пещь огненну ко отроком еврейским снизшедшаго, и пламень в росу преложшаго Бога, пойте, дела, яко Господа, и превозносите во вся веки.
     Запев: Святый великомучениче и целителю Пантелеимоне, моли Бога о нас.
     Художное Твоея благоцветущия души, неразумие отца исцеляет, подающи свет верою преблаженне притекающым, и ко Спасу Христу наставляющи.
     Запев: Святый великомучениче и целителю Пантелеимоне, моли Бога о нас.
     По Христе заклан быв, к вечней жизни преминул еси. и Богозванен явися, именованием Божиим богомудре: тем почитаем тя, и превозносим Христа во веки.
     Слава Отцу и Сыну и Святому Духу.
     Витийское отложь, и лютое мудрец поучение, Христовем призыванием, и лютых страстей корения посекаеши, исцеляя поющыя Христа во веки.
     И ныне и присно и во веки веков. Аминь.
     Богородичен: Безсмертия зарю вемы источника Тя, Богородице, яко Рождьшую Слова Безсмертнаго Отца, Иже всех смерти избавляющаго, превозносящих Его во веки.
     Песнь 9.
     Ирмос: Безначальна Родителя Сын, Бог и Господь, воплощься от Девы нам явися, помраченныя просветити, собрати расточенныя, Тем Всепетую Богородицу величаем.
     Запев: Святый великомучениче и целителю Пантелеимоне, моли Бога о нас. [Поклон]
     Преставися радуяся к желанию конечному, идеже вселься, преблаженне, блаженныи конец прияти сподобися. воистину сыи со Владыкою своим, во веки безконечныя.
     Запев: Святый великомучениче и целителю Пантелеимоне, моли Бога о нас.
     Желание получил еси, и любве Твоея исполнение, каплющей еще теплей крови, яко за Христа излиявшейся, от Негоже радуяся приял еси венцы подвиг твоих.
     Запев: Святый великомучениче и целителю Пантелеимоне, моли Бога о нас.
     Львом уста, и зверем зияния, якоже Даниил древле ты обуздал еси, весть бо стыдетися, мучениче, добродетели и безсловесное естество, темже тя преславне, сошедшеся ублажаем.
     Слава Отцу и Сыну и Святому Духу.
     Богатную милость тебе Христос дарует, сокровищ исцелением нам даруя, и всемилостива изволением, тя подав всякому скорбящему, и пристанище тихо, и предстателя и защитителя.
     И ныне и присно и во веки веков. Аминь.
     Богородичен: Яко руно, Всенепорочная, дождь Небесныи во утробе заченши нам родила еси, иже тишину дающаго, яко Бога Того поющым и Тя, Всепетую Богородицу проповедающым.
     И по каноне поем:
     Достойно есть: или задостойник сей:
     Владычице, приими молитву раб Своих и избави нас от всякия нужды и печали. Ты еси, Богородице, оружие наше и стена. Ты еси Заступнице, и к Тебе прибегаем, Тя и ныне на молитву призываем, да избавиши ны от враг наших, возвеличим Тя вси, Пренепорочную Матерь Христа Бога нашего, Юже осени Дух Пресвятый.
     И поклон земный.
     Если же есть великий праздник Господень или Богородичен, поем задостойник праздника.
     Посем, Трисвятое. И по Отче наш:
     Тропарь , глас 3-й:
     Cвятый великомучениче и целителю Пантелеимоне, моли Милостиваго Бога да прегрешений оставление подаст душам нашим.
     Слава Отцу и Сыну и Святому Духу.
     Кондак, глас 5-й: Подражатель сый Милостиваго и исцелений благодать от Него прием, стратотерпче и мучениче Христа Бога, молитвами Твоими душевныя наша недуги исцели, отгоняя присно борца соблазны от вопиющих верно: спаси ны, Господи.
     И ныне и присно и во веки веков. Аминь.
     Богородичен, глас 3-й: Тя, Ходатайствовавшую спасение рода нашего, воспеваем, Богородице Дево, плотию бо, от Тебе Восприятою Сын Твой и Бог наш, Крестом восприим страсть, избави нас от тли, яко Человеколюбец.
     После тропарей
     Господи, помилуй, 40 раз
     Слава Отцу и Сыну и Святому Духу и ныне и присно и во веки веков. Аминь.
     Аминь.
     И читаем молитву ко святому великомученику и целителю Пантелеимону.
     О, великий Христов угодниче и преславный целебниче, великомучениче Пантелеимоне! Душею на Небеси Престолу Божию предстояй и Триипостасныя славы Его наслаждаяяйся, телом же и ликом святым на земли в Божественных храмех почиваяй и данною Тебе благодатию различная источаяй чудеса, призри милостивным оком на предстоящия люди и честней твоей иконе умильно молящияся и просящия от тебе целебныя помощи и заступления. Простри ко Господу Богу нашему теплая своя молитвы и испроси душам нашим оставление согрешений. Се бо мы за беззакония наша не смеюще возвести очес наших к высоте Небесней, ниже вознести глас молебный к Его в Божестве неприступней славе, сердцем сокрушенным и духом смиренным тебе, ходатая милостива ко Владыце и молитвенника за ны, грешныя, призываем, яко ты приял еси благодать от Него недуги отгоняти и страсти исцеляти. Тебе убо просим: не презри нас, недостойных, молящихся тебе и твоея помощи требующих. Буди нам в печалех утешитель, в недузех лютых страждущим врач, напаствуемым скорый покровитель, очесем недугующим прозрения датель, ссущим и младенцем в скорбех готовейший предстатель и исцелитель. Исходатайтвуй всем вся, яже ко спасению полезная, яко да твоими ко Господу Богу молитвами получивши благодать и милость, прославим всех благих Источника и Дароподателя, Бога Единаго в Троице Святей славимаго, Отца и Сына и Святаго Духа, ныне и присно и во веки веков. Аминь.
     Иная молитва святому великомученику, чтомая от лица болящаго:
     О, великий угодниче Христов, страстотерпче и врачу многомилостивый, Пантелеимоне! Умилосердися надо мною, грешным рабом, услыши стенания и вопль мой, умилостиви Небеснаго Верховнаго Врача душ и телес наших, Христа Бога нашего, да дарует ми исцеление от недуга, мя гнетущаго. Приими недостойное моление грешнейшаго паче всех человек. Посети мя благодатным посещением. Не возгнушайся греховных язв моих, помажи их елеем милости твоея и исцели мя; да здрав сый душею и телом, остаток дний моих, благодатию Божиею, возмогу провести в покаянии и угождении Богу и сподоблюся восприяти благий конец жития моего. Ей, угодниче Божий! Умоли Христа Бога, да предстательством твоим дарует ми здравие телу и спасение души моей. Аминь.
     По молитве: Честнейшую Херувим и Славнейшую без сравнения Серафим, без истления Бога Слова Рождшую, сущую Богородицу Тя величаем.
     
     По сем, Слава, и ныне.
     Господи, помилуй, трижды. Господи, благослови.
     И отпуст: Господи, Иисусе Христе, Сыне Божий, молитв ради Пречистыя Твоея Матере, и святаго великомученика Пантелеимона, и всех святых, помилуй и спаси нас, яко Благ и Человеколюбец.
     Аминь.